Тірі адамның жүректен аяулы жері жоқ. Рақымдылық, мейірбандылық, әртүрлі істе адам баласын өз бауырым деп, өзіне ойлағандай оларға да болса игі еді демек - бұлар жүрек ісі. Асықтық та - жүрек ісі
Шала мейір - шала байқайды
Адам баласын заман өсіреді
Сұрауын табамын, қалауын табамын деп жүріп қорлықпен өмір өткізгенше - малды не жерден сұрау керек, не маңдай терден сұрау керек
Иман сақтауға - қорықпас жүрек, айнымас көңіл, босамас буын керек
Тіл жүректің айтқанына көнсе - жалған шықпайды
Құдайшылық - жүректе
Өзің құрметтемеген нәрсеге бөтеннен қайтіп құрмет күтесің? 
Адам ақылсыздығынан азбайды, ақылдының сөзін ұғып аларлық жүректе жігер, қайрат, байлаулылық жоқтығынан азады
Естілердің айтқан сөздерін ескеріп жүрген кісі өзі де есті болады